Şagirdlər 1-ci sinifdən 11-ci sinifə qədər hər həftə azı 2-3 dərs ingilis dili dərsini keçirlər. Bir şagirdin ingilis dilində beginner səviyyəsində danışması bizi niyə təəccübləndirə bilər?
Bu səviyyədə danışıq bütün şagirdlərdə olmalıdır.Raport.az xəbər verir ki, bu etiraz təhsil eksperti Kamran Əsədovdan gəlib. Etiraza səbəb 13 yaşlı Xınalıq şagirdinin ingiliscə suallara cavab verə bilməsinin bu qədər təəccüb yaratmasıdır.
Ekspertin sözlərinə görə kurikulum standartlarına görə tədris ilinin sonunda şagirdlərdə formalaşdırılması zəruri olan bilik və bacarıqlarda bu qeyd olunur.
Hətta DİM buraxılış imtahanında bu amili əsas götürərək writing, listening və hətta gələn ildən speaking bacarıqlarını yoxlayır:
“Yəni hər bir şagird minimum xarici dildə danışmaq bacarığına malik olmalıdır. Bunu etmək təhsilin borcudur.
Şagird sinifdən-sinifə keçirsə, deməli onda bu bacarıqlar da formalaşdırılıb. Yox əgər bu baş vermirsə, deməli heç kim işinin öhdəsindən layiqincə gəlmir.
Gör Elm və Təhsil Nazirliyi ölkədə təhsil sistemini necə məhv edibsə, adi danışıq bizə belə sevinc bəxş edir, yaxşı mənada təəccübləndirir.
Belə davam etsə, Elm və Təhsil nazirliyinin bu qədər biabırçı fəaliyyəti nəticəsində, şagirdlərin Azərbaycan dilində danışması bizi sevindirəcək.
Hələ utanmadan da bunu Elm və Təhsil nazirliyinin rəsmiləri uğur kimi təqdim edirlər”.
Bir şagirdin ingilis dilində beginner səviyyəsində danışması bizi niyə təəccübləndirir? – ETİRAZ
